3500x2400px_Hero Images_8b

Suliffimmi pitsaasunik atugaqartitaaneq

Peqqinnartumik sulinermut tunngatillugu anguniakkagut angorusutagullu Naalagaaffiit Peqatigiit anguniagaat nunarsuarmut tamarmut atuuttut #8-nniit tunngaveqarput

CSR-UK-Icon-8
Avatangiisitigut aqutsineq sullivimmi avatangiisinut aqutsinertalik pilersikkusupparput, timikkut aamma tarnikkut sullivimmi avatangiisinut aamma sulisut tamarmik ajunngitsuunissaannut illersuisoq. Immitsinnut piumasaqaateqartarnitsitut pilersuisugut assigiimmik piumasaqaateqarfigisarpagut.

Healthy Working Lives-imi immikkoortut tallimat qitiutippagut:

1. Suliffissanik pilersitsineq 

Sulisorpassuit pingaartumik apriilimiit oktobarimut ulapaarfimmi aalisakkanik qalerualinnillu tunisanik naleqarnerulersitsinissamut pisariaqartinneqaqaat. Taamaammat sulisussaaleqeratarsinnaaneq aarlerinarnerpaammat illoqarfinni annerusuni, assersuutigalugu Ilulissani, sulisussaaleqeratarsinnaaneq aarlerinarnerpaavoq. 

Suliffeqarfimmi suiaassutsit assigiinngisitaarnerlu oqimaaqatigiilluarnissaat taamaalillunilu nalerisimanissamut toqqammaviliilluarnissaq anguniarlugu assigiinngisitaarneq pingaaruteqartoq Royal Greenlandimi isumaqartoqarpoq. Suliffeqarfimmi nalerisimaneq sulisunik attassiinnarnissamut sulilertussanillu kajumilersinissamut pingaaruteqarluinnartoq isumaqarpugut.

Ullumikkut Nunatsinni tunisassiorfinni sulisut pingajorarterutaat arnaapput. Suiaassutsit akornanni oqimaaqatigiinnerusumik agguataarisumik atorfinitsitsisoqartarnissaa anguniarneqarpoq, tamatuma suleqatigiilluarneq aamma sullivimmi avatangiisit pitsaasut qulakkeersinnaammagit.

 

2. Aqutsisoqatigiinni qaffasinnerusumik atorfilinni suiaassutsit agguataarnerat

Royal Greenland ukiorpassuarni arnat angutillu agguataarneri nalingiissillugu siulersuisoqarpoq. 2023-mi arnat 43 %-iupput angutillu 57 %-iullutik.

Ukiumoortumik naatsorsuusiortarnermut inatsimmi §99b naapertorlugu suliffeqarfimmi Royal Greenlanditut angitigisumi aqutsisoqatigiinni qaffasinnerusumik atorfilinni aqutsisunilu allani suiaassutsip ikinnerussuteqartup amerlassusissaanut anguniagassiisoqarlunilu anguniakkap qaqugu anguneqarnissaanut naatsorsuutigisat nassuiaatigineqassapput.

 

3. Sulinermi avatangiisit

Pitsaasumik assingiiaartumillu sullivimmi avatangiiseqarnissap siuarsarnissaani aaqqissuussaasumik sulinikkut aamma sullivimmi avatangiisinik aqutsineq tamakkiisumik isiginnittoq suleqatigiinnut nassuiarneratigut periarfissaqarluarneq takusinnaavarput. Tassani suleriutsit assigiiaartut sakkussallu najukkanut naleqqussarneqarsinnaasut suliarineqassapput.

Nalerisimaneq pingaartillugu

Ukioq allortarlugu Royal Greenland Nunatsinni sulisut naammagisimaarinninnerinik misissuisarpoq (MTU). Misissuineq kingulleq, 2023-mi sulisut 1091-it 79 %-it akissuteqarsimapput. 

2023-mi MTU-mi nalerisimanermut aamma tusaamaneqarnermut inernerit pitsaanerpaasut. Royal Greenlandimi suliffimmik naammagisimaarinninneq 82 %-imut uuttorneqarpoq, Nunatsinni suliffeqarfinnut allanut 77 %-imut sanilliullugu.Suliffeqarfimmut tunniusimaneq 85 %-imiippoq. 

Sulisut suliamik imarisaanut suleqatigiinnermullu naammagisimaarinninnerat siusinnerusukkut misissuinermit 79 %-imit 85 %-imut qaffappoq. Qaffariaat tamanna ukiut kingulliit iliuuserineqartorpassuarnit aallaaveqarpoq, assersuutigalugit tunisassiorfinni Sulisa+, aqutsisunut ilinniartunullu bootcampertitsineq, minnerunngitsumillu Siukkaat, peqataatitsinermik ukkataqarluni pikkorissarnerusoq iliuuserineqarlutik. Tassunga atatillugu ulluinnarni aqutsisut sullivinni avatangiisit pitsaasut pilersinniarlugit attatiinnarniarlugillu iliuuseqartarput.

4. Pisiortorfinnik ileqqorissaarluarluni nakkutilliineq, inuit piginnaatitaaffii aamma ingerlatsinermi ileqqorissaarneq

Royal Greenland nunani tamalaani soqutigisaqarfinnilu assigiinngitsorpassuarni niuertarpoq. Pisiortorfigisartakkavut nunamit suminngaanneerfii kiisalu nunat appasissumik, akunnattumik qaffasissumillu nalorninartullit naapertorlugit immikkoortitertarpagut. Sumiluunniit kinaluunniit niueqatigigaluarutsigu inuit sulisullu pisinnaatitaaffiinik avatangiisit pillugit atugassarititaasunik tunisassiallu pisarineqarneraniit tunisaanissaanut paasissutissartaasa eqquutsinneqarnissaat pillugu pisussaaffeqarpugut. Pisiortorfigisartakkavut nunanit akunnattumik qaffasissumilluunniit nalorninartulimmeersuttaaq apeqqutinik akisassartalimmik immersuisarput.

 

5. Peqquserlulluni iluanaarniartarnerup peqquserlunnerullu akiorniarnera

Royal Greenlandimi peqquserlulluni iluanaarniarneq akuerinngilarput. Akileraarutinik akiligassanik unioqqutitsilluni ikilisaaneq, pinerlunnikkut aningaasannattaanik malunnarunnaarsaaneq, allat aningaasaataannik atornerluineq akilerneqarlunilu peqquserlunneq tassunga ilaapput. Kulturit assigiinngitsut suliaqarfigaagut taamaattumik aaqqissuussaanermi tamarmi ileqqorissaarnermut najoqqutassaqarnissaq pillugu ersarissumik piumasaqaateqarnissaq pingaaruteqarpoq.

Nalorninassuseq ilisimasaqarfigilertinniarlugu sulisut ilinniartinneqartarnissaat pingaaruteqarluinnarpoq. Suliffeqarfimmi pinerluttoqarsimanera paasineqassappat whistleblowereqarnermik aaqqissuussaq atorlugu nalunaaruteqartoqarsinnaavoq.